唔係光棍節，係和平紀念日

2014年11月14日 公民教育,政治,最新文章綜覽 域寒根

Field Poppy

筆者留學加拿大，因為時差問題，香港嘅時間總係比呢邊快十幾個鐘，所以有乜野節日，未落床就已經有晒啲happy乜乜乜、merry乜乜乜喺電話睇。 11月11日，一朝早起身成個News Feed都係光棍節，我有點為時下香港一點悲哀。原來一個本來莊嚴嘅日子已經被一個近年大陸嘅網絡風潮取締，變成慶祝單身、惡搞情侶以及瘋狂網購嘅自憐節日。

可能係筆者對情情愛愛嘅嘢唔太注重，覺得單身冇乜嘢咁大不了要慶祝；但又可能有唔少人唔知，11月11日一向喺香港都係一個特別日子，不過唔係光棍節。香港主權移交之前，每年十一月官方都會好似其他英聯邦國家咁有紀念日，港督官員都會戴上罌栗花扣針， 參與紀念世界大戰陣亡嘅軍人。11月11日，叫和平紀念日，紀念活動就喺最接近嘅星期日舉行。香港亦曾經係二戰嘅戰場之一，1941年12月日本侵略，大量英國以及加拿大軍人防止日軍南下期間被俘虜，史稱香港保衛戰。隨後日佔三年零八個月，期間大量被俘虜軍人被處決陣亡。直至日本1945投降，香港重光脫離戰時狀態，殖民地政府收回香港後將8月30日定為重光紀念日，直至回歸後因為政治因素取消。

如果以上嘅嘢你完全唔知，我好抱歉，中共拭去香港人本地文化身分認同嘅大計已經步步進逼，經過17年猶如水土流失，令香港人再次變得無根，面對周融亂咁引用歷史對比佔中亦無言以對。雖然依家和平紀念星期日仲有舉行，罌栗花扣針依然有人戴，而官員亦會出席，不過已經嚴重被刁淡，冇乜人知，甚至皇后像廣場嗰個紀念碑係為乜而立都唔知。以上種種，係我哋香港人嘅歷史嘅一部分，而非中共港共洗走晒港人對於本地歷史嘅認識然後監粗訂立9月3日「中國人民抗日戰爭勝利日」，抹除英軍加軍所有嘅effort同傷亡，又粗暴將當年嘅英屬香港人「被中國人民」。中共抹走文化認同，當然亦包括普教中，大肆宣傳普通話嘅重要性，令家長們放棄我哋廣東話呢個貼近古語嘅珍貴語言。語言重要，歷史亦重要。

近日，中大傳播與民意調查中心調查顯示，越來越多人識得認自己係香港人，而只認自己係中國人嘅受訪者創新低。此外，認同自己係香港人嘅有好大部分都係我哋年輕一代。呢個結果當然值得欣喜，但係歷史亦都係對一個本地身分嘅好重要嘅基礎。好多香港嘅新一代就正正缺少認識本地歷史呢個身分認同嘅重要一環，因為喺回歸後，好多本地歷史嘅重要日子從月曆上抹去，話題性大大降低之餘，喺學校亦比較少機會接觸呢類本地嘅歷史，只重視中西史。依據筆者嘅經歷，喺學校學到嘅歷史，好多都只會係世界大戰、宋元明清等等，對於本地開埠至今嘅歷史卻只係見好就收，中小學唯一一次包含喺必修科入面，已經係小學常識科。以港共政權喺回歸後多次以發展為理由清拆殖民地建築，推行國民教育等政策傾向，未來對於本地史嘅接觸面勢必逐漸減少。

香港有實質記載嘅歷史可能只有一百六十幾年，但當中所發生嘅事密密麻麻，由漁港變身工業物流中心，再變身金融中心，轉變速度實在令人驚嘆，亦耐人尋味。筆者認為，如果中西史重要嘅話，香港史就一定起碼平起平坐，課內未能包涵，課外亦要提，因為單靠年輕人自行上維基百科尋寶實在唔足夠。尤其依家大家都開始覺醒，開始認為自己係香港人，就應該趁呢個機會俾身邊嘅人更加熟識呢一個身分背後昔日香港嘅起起跌跌，加上通識科學到嘅「今日香港」，對於身分嘅認識以及文化嘅認同都必定有所幫助。

政權會變，我哋依家已經唔係英國殖民地，但輯入史冊嘅歷史就永遠係我哋嘅歷史，並唔會因為「政治因素」而忽然唔見咗。 要做得一世香港人，就要從呢度嘅過去出發，向深處埋藏嘅陳年土壤植根。

下年11月11，孤身光棍定還是紀念歷史，你揀。